أخبار عربية

تونس وشهادةُ تونسيٍّ عائد من فلوريدا الأمريكية

هذه شهادة تونسي “Sofiene Jouini” عائد من فلوريدا الأمريكية، معجب بتونس وحسن الاستقبال الذي لقيه ومن كان معه في الطائرة التي أقلّتهم من مطار فلوريدا إلى مطار تونس قرطاج، قبل أن يتمّ نقلهم إلى الحجر الصحي.

وهذه تدوينة سفيان الجويني: “

.
كيف تمشي إلى أي مطار في العالم و تلقى روحك الوحيد اللي تنجم تروح لبلادك و عايلتك على خاطرك تونسي. اي نعم على خاطرك تونسي. كيف تشوف خواتنا المغاربة و الدزيرية ما ينجموش يروحو لبلادهم و المصاروة لازم يقصو و يدفعو 1500$ للحجر الصحي ( عايلة ب 4 يخلصو 6000$ على جمعتين حجر في هوتال )
ركبت من مطار فلوريدا، الطيارات الكل تهز وسط امريكيا. إلّى طيارة وحدة انترنسيونال لتوانسة تهزك لالمنيا و بعد تونس. عمري ما ننسا الدزيري الي شفتو يبكي في مطار فرانكفورت ألمانيا ما نجمش يروح لبلادو. تونيسار الي حياتي الكل نضحك علاها نلقاوهم يستناو في المانيا بش يروحو بينا، تسمع كان مرحبا و تفضل و الحمد لله على سلامتك. نوصل المطار تونس قرطاج الي كنت نحسو محطة كيران، نلقاو وزارة الصحة تستنى فيك تقيسلك السخانة و تعقمك انت و باسبورك و حوايجك. البوليس الي كنت كيف نشوفو يقمع و يسب و يهين في العباد في الشارع و خاصة في الستاد و الي كنت نسب فيه ونكرهو مالظلم متاعو، نلقاوهم يستناو فينا بالضحكة 15 دقيقة قبل المغرب و يقلك مرحبا بيك في بلادكك، الدمعة تهبط و حدها فما بوليس عطى ماكلة من شقان فطرو لمرا حبلة. و يزيد يهز معاك حوايجك للكار الي معقمة اكثر من مطارات امريكيا ويوصلوك للأوتتيل وين نلقاو المعتمد و وزارة الصحة تستنى.
نظام في الدخول و نظافة و برشا تربية. ماكلة باهية في شقان الفطر و في الصحور؛ حلو، مالح، غلة… كل شي بلاش و كي تحب ماكلة مالبرة تكتب ليستا و تعطيهم الفلوس، يجيبولك القضية في ساعة و يرجعلك الباقي. حتى القهوة يجيبوهالك بعد شقان الفطر.
وزارة الصحة تطلبك كل صباح تسأل عليك و طبيب يجيبلك دواء حتى متع راس ببلاش و حتى البيتك. حاسيلو و الله لاني مصدق شعاملين معانا.
تونس قاعدة تحارب على ولادها. تونس اللي قد ما تسبها ساعات، تزيد تحبها في كل محنة.
وزارة النقل، وزارة الصحة، و الداخلية، الف شكر و تحيّة
شهادة تونسى مهاجر
تونس تحارب على ولادها”.
Views: 0

Tags

Midou

صحافي وتربوي، عمل في عديد الصحف الورقية والمواقع الإلكترونية منها إيلاف والعرب اليوم وإرم نيوز والشارقة 24 والتقرير وقنطرة.

Related Articles

Leave a Reply

Back to top button
Close
Close